Kolfinna Jóhannesdóttir skólameistari MB og Ágúst Sigurðsson rektor Landbúnaðarháskóla Íslands undirrituðu í dag samstarfssamning um tilraunakennslu náttúrufræðibrautar með búfræðisviði til stúdentsprófs. Samningurinn felur í sér að allt að fimm nemendur sem innritast á brautina hjá MB árin 2012 – 20015 eiga vísa skólavist í búfræði hjá LbhÍ eftir að hafa lokið þeim hluta námsins sem fram fer í MB. Við inntöku nemenda á hina nýju braut er miðað við að þeir hafi reynslu af störfum í landbúnaði og uppfylli önnur inntökuskilyrði sem kveðið er á um fyrir búfræðinám við LbhÍ á Hvanneyri. Væntanlegir nemendur munu því útskrifast, að loknu fjögurra ára námi, með stúdentspróf frá MB af náttúrufræðibraut/búfræðisviði auk þess sem þeir útskrifast sem búfræðingar frá LbhÍ. Engir fjármunir fara á milli skólanna en nemendur greiða skráningargjöld við MB fyrri tvö skólaárin og við LbhÍ seinni tvö árin. Eftir fyrra námsár fyrsta tilraunahóps á þessari nýju námsleið munu skólarnir meta reynslu og árangur af náminu og endurskoða það í samræmi við niðurstöður.
