Fyrrverandi nemandi MB sem hefur náð langt!

Bjarki Þór Grönfeldt sem útskrifaðist með stúdentspróf frá Menntaskóla Borgarfjarðar árið 2013 hefur heldur betur staðið sig vel í námi eftir að hann fór frá MB.

Að loknu stúdentsprófi lá leið hans í Háskólann í Reykjavík þar sem hann útskrifaðist með BSc próf í sálfræði árið 2016.

Nú hefur Bjarki hlotið „Vice Chancellor’s Research Scholarship“ til doktorsnáms í félagslegri sálfræði við Háskólann í Kent í Bretlandi. Hann útskrifast áður með meistarapróf í stjórnmálasálfræði frá sama skóla í nóvember 2018. Í meistararitgerð sinni rannsakaði Bjarki áhrif hóplægrar sjálfdýrkunar (enska: collective narcissism) á samskipti innan stjórnmálaflokka. Hóplæg sjálfdýrkun er útblásin trú einstaklings á ágæti og yfirburði eigin hóps. Í doktorsnámi sínu mun hann skoða áhrif hóplægrar sjálfsdýrkunar í víðara samhengi, og leitast við að svara spurningum líkt og af hverju það gerist að fólk sem virðist á yfirborðinu vera hliðhollt og tryggt eigin hópi, nýtir gjarnan hópinn sinn til að skara eld að eigin köku.

Við í MB erum endalaust stolt af Bjarka og óskum honum alls hins besta í doktorsnáminu.