Home » Fréttir

Category Archives: Fréttir

Útivistaráfangi í fyrsta sinn

Í vor bauðst nemendum að velja sér nýjan valáfanga sem heitir Útivist. Megin markmið áfangans var að bjóða nemendum uppá heilsueflandi upplifun ásamt því að þjálfa þau í að undirbúa sig fyrir gönguferðir og útivist.
Alls 16 nemendur gátu tekið þátt enda var plássið í gistiskálanum takmarkað. Áfanginn fylltist fljótlega og þegar kennararnir Bjarni og Sössi hittu nemendur í ágúst þá var ljóst að eftirvæntingin var mikil.
Ákveðið var að leggja af stað á hádegi föstudaginn 31.ágúst og gista eina nótt. Fyrst átti að leggja af stað frá Hreðarvatni og byrja á því að klífa Vikrafell en þar sem veðurútlitið á föstudeginum var óljóst þá var ákveðið að keyra áleiðis að Langavatni og hefja gönguna við Gljúfurá. Fyrri dagurinn var styttri eða rúmir 10 kílómetrar og var komið að leitarkofanum við Torfhvalastaði seinnipart dags eftir þægilegan göngutúr í góðu veðri.
Þá höfðu aðstoðarmenn okkar komið með mat og svefnbúnað á kerru upp að skálanum og því var ekki mikill farangur sem göngumenn þurftu að burðast með.
Þegar allir höfðu komið sér fyrir þá tóku kennararnir fram súpu sem Lilja Bríet matráður skólans hafði galdrað fram og allir gátu borðað sig pakksadda ásamt brauði og smjöri.
Þar sem ekkert netsamband var í skálanum þá voru fljótlega allir farnir að spila á spil. Í kvöldkaffinu var dregin fram hjónabandssæla ásamt kexi og heitu kakói. Einhver þreyta gerði vart við sig því allir voru sofnaðir um klukkan 22:30. Að morgni laugardagsins var borðaður morgunmatur og tiltekt hófst, það gekk vel og allir voru tilbúnir að ganga af stað klukkan 9:00.
Enn var breytt um gönguleið og í staðinn fyrir að fara norður fyrir Langavatn þá var stefnan tekin á Valbjarnarvallamúlann og svo þaðan niður að Valbjarnarvöllum. Laugardagsgangan var um 14 kílómetrar og flestir göngumenn voru við hestaheilsu þegar niður var komið.
Almenn ánægja var með þessa ferð og miklar líkur á því að þetta verði aftur í boði að ári.
BÞT

 

Nýnemaferð NMB 2018

Í gær stóð Nemendafélag Menntaskóla Borgarfjarðar fyrir nýnemaferð í samstarfi við skólann en farið var með rútu til Reykjavíkur. Nemendur heimsóttu Reykjavík Escape þar sem þeim var skipt niður í nokkur herbergi en til að komast útúr herbergjunum þurftu hóparnir að leysa þrautir saman á innan við klukkustund. Einn hópurinn fór með framúrskarandi sigur úr býtum og vöktu aðdáun starfsmanna Reykjavík Escape, enda klárir krakkar í MB. Að þessu loknu var farið í stigaleik um borgina þar sem nemendur þurftu að leggja ýmislegt á sig til að fá stig svo sem að fá mynd af sér með túrista að gera gleraugu. Myndin sem fylgir fréttinni er lýsandi fyrir það. Að lokum var hópnum svo boðið uppá pizzu sem var kærkomin endir á frábærum degi.

Skólinn fer vel af stað

Menntaskóli Borgarfjarðar var settur mánudaginn 21. ágúst og hófst samkvæmt stundatöflu þriðjudaginn 22. ágúst. Skólastarfið fer vel af stað og ekki annað að sjá en að kennarar og nemendur séu ánægðir. Nemendur skiptast á hinar fjölmörgu brautir skólans en langflestir eru á Félagsfræðabraut en svo eru Náttúrufræðibraut og Opin braut vinsælastar. Opin braut býður uppá mikið val af hálfu nemandans og slíkar brautir eru alltaf að verða meira vinsælar á landsvísu. Sex nemendur eru skráðir á Náttúrufræðibraut – búfræðisvið sem er samstarf milli MB og Landbúnaðarháskólans á Hvanneyri. Þetta haustið eru þrjátíu og fjórir nýnemar að hefja nám, sex eldri nemendur hafa snúið aftur til okkar í nám og fjórir duglegir grunnskólanemendur eru í ensku og dönsku hjá okkur. Við skólann verða fjórtán fjarnemar og sjö einstaklingar á starfsbraut. En fyrir utan þær brautir sem hafa verið nefndar bjóðum við uppá Framhaldsskólabraut, Heilbrigðisritarabraut í samstarfið við Fjölbraut í Ármúla og Fjarmenntaskólann ásamt Íþróttafræðibraut sem hefur verið vinsæl síðustu ár. Starfsfólk MB hlakkar mikið til vetursins og samstarfsins við nemendur og foreldra skólans.