Allir nemendur skólans taka þrjá STEAM áfanga. En STEAM stendur fyrir vísindi, tækni, verkfræði, listsköpun og stærðfræði. Greinarnar eru samþættar og er eðli STEAM náms og kennslu að byggja á skapandi og gagnrýnni hugsun í gegnum verkefni sem eru þverfagleg og geta byggt á áhugasviði nemenda sjálfra.
STEAM nám hvetur til nýsköpunar á öllum sviðum. Í ferlinu læra nemendur líka þá færni og hæfni sem atvinnulíf og háskólar hafa kallað eftir. Þegar rýnt er í kennslufræði og innihald STEAM kennslustunda þá má sjá að þær þjálfa nánast alla þá færni og hæfni sem kallað er eftir í síbreytilegu samfélagi og atvinnugreinum ásamt grunnþáttum náms og lykilhæfni samkvæmt aðalnámskrá framhaldsskóla.
STEAM áfangarnir í MB voru þróaðir í samvinnu við rýnihóp sem í sátu fulltrúar háskólanna ásamt starfsfólki skólans. Námsefni er einnig þróað í samvinnu við háskólana, starfsfólk MB og aðra sem búa yfir sérþekkingu á greinunum.
MB er eini framhaldsskólinn á Íslandi sem hefur STEAM áfanga í kjarna á stúdentsbrautum og ástæðan fyrir því er sú að með því að kenna STEAM teljum við að nemendur sem útskrifast með stúdentspróf úr MB verði betur í stakk búnir til að takast á við áframhaldandi nám eða vinnu að lokinni útskrift.